धनगढी, २० मंसिर । नेपाली कांग्रेसको आशन्न १४ औं महाधिवेशनमा केन्द्रीय पदाधिकारीमा कञ्चनपुरका एक नेताले पनि पदाधिकारीमा उम्मेदवारी दिने तयारी गरेका छन् । यद्यपि उनले आधिकारिक घोषणा भने गरिसकेका छैनन् ।
कञ्चनपुर क्षेत्र २ का पूर्वसांसद तथा कांग्रेस केन्द्रीय सदस्य एनपी साउदले १४ औं महाधिवेशनमा महामन्त्रीमा उम्मेदवारी दिने तयारी गरेका हुन् ।
कांग्रेसका प्रभावशाली नेता मानिने मध्येका एक साउदले सार्वजनिक रुपमा उम्मेदवारी बारे न बोले पनि उनको सचिवालयले आइतबार महामन्त्रीका उम्मेदवार लेखिएको पोस्टर सामाजिक सञ्जाल फेसबुकमा सार्वजनिक गरेको छ ।
साउद पार्टी सभापति शेरबहादुर देउवा खेमा (संस्थापन) का नेता हुन् । उनको सचिवालयले चुनावका लागि काठमाडौं अनामनगरमा सम्पर्क कार्यालयसमेत खोलिसकेको छ ।