डोटी– निजामती सेवामा खुला प्रतिस्पर्धाबाट छनोट गरिने निजामती सेवा राजपत्राङ्कित तृतीय श्रेणी (शाखा अधिकृत) पदमा डोटीका दुई जना सहित सुदूरपश्चिम प्रदेशका ३६ जना सिफारिस भएका छन् ।
लोक सेवा आयोगले प्रकाशित गरेको पदपूर्तिसम्बन्धी नतिजाअनुसार प्रशासन, लेखा, लेखापरीक्षण, राजस्व र संसद् सेवा समूहका चार सय ८५ जना अधिकृत उत्तीर्ण भएकामध्ये सुदूरपश्चिमका ३६ जना उत्तीर्ण भएका हुन् । प्रदेशमा सबैभन्दा बढी कञ्चनपुरका १०, बझाङका ८, कैलाली र दार्चुलाका ४÷४, अछाम र बैतडीका ३÷३ र डडेल्धुरा र डोटीका २÷२ जना सिफारिसमा परेका छन् ।
गत भदौमा सबै परीक्षा पूरा गरे पनि कर्मचारी समायोजनसम्बन्धी विवादका कारण उत्पन्न जटिलता जोडिएपछि सर्वोच्चको आदेशमा नतिजा प्रकाशन रोकिएको थियो । सर्वोच्चले केही दिनअघि दिएको आदेशअनुसार रोकिएको नतिजा प्रकाशन सार्वजनिक गरिएको हो ।