साउदी अरेबियाको सरकारी स्वामित्वको तेल कम्पनी साउदी अरामकोले तेलको उत्पादन ठूलो मात्रामा बढाउने भएको छ।
तेल उत्पादनका लागि आवश्यक लगानी अरामकोले बढाउने योजना बनाएको अन्तर्राष्ट्रिय सञ्चारमाध्यमले जनाएका छन् । सन् २०२१ मा मुनाफा दोब्बर भएपछि अरामकोले लगानी दोब्बर गर्ने भएको हो ।
अरामकोले आउँदो पाँच वर्षमा तेल उत्पादन बढाउने उद्देश्य लिएको छ। पछिल्लो महिना मागको तुलनामा तेल तथा ग्यासको आपूर्ति कम हुँदा मूल्य बढेको छ ।
युक्रेनमा जारी युद्ध र रुसी तेलमाथिको निर्भरताबाट छुटकारा पाउनका लागि विकल्पको खोजी भइरहेको छ । मूल्य बढ्दै गएका बेला उत्पादन बढाउने योजनाको विश्वका नेताहरुले स्वागत गर्ने सम्भावना छ ।
अरामकोले गर्ने थप लगानीको परिणाम पाँचदेखि ८ वर्षमा देखिने भएकाले तत्कालका लागि समस्या समाधान भने हुने देखिँदैन । गएको हप्ता बेलायती प्रधानमन्त्री बोरिस जोन्सनले साउदी अरेबियाको भ्रमण गरेका थिए ।
उनले साउदी अरेबियालाई विश्व बजारमा छोटो अवधिमा तेलको आपूर्ति बढाउन दबाब दिएका थिए।
साउदी अरामको अर्गनाइजेशन अफ द पेट्रोलियम एक्सपोर्टिङ कन्ट्रिज ओपेकको ठूलो उत्पादक हो। तेलको मूल्य विश्व बजारमा पछिल्लो १४ वर्ष यताकै उच्च भएका बेला उत्पादन बढाउने योजना मूल्य कम गर्ने विकल्पका रुपमा रहेको छ।